同暗瘡分手💔 還原光滑肌膚 😊

已經過咗青春期，仲會經常生暗瘡 ? 暗瘡仲有分熟女瘡、口罩瘡、荷爾蒙瘡 ? 一齊嚟睇下對治方法。

暗瘡位置全面睇

許懿清醫師指出，生喺面上嘅暗瘡，唔同位置代表唔同健康問題🔎 :

1. 眉心、額頭、兩邊太陽穴
大多同壓力有關，主要係心火盛或肝火旺🔥，建議改善睡眠同處理好情緒，減少食熱氣野。

對應食物 ：洋甘菊茶 🌼
飲咗洋甘菊茶，可舒緩身體壓力，有安眠作用。而鬱金、素馨花等都有助改善睡眠質素。

對應食物 ：蓮子芯
唔怕苦人仕，可直接煲水飲💦 ; 怕苦可加百合、雪耳、洋薏米煲糖水。有效清心火、清熱、清潤同預防暗瘡。

2. 下巴、嘴角
第一，可能同內分泌有關，或受經期及荷爾蒙影響，建議唔好食太多生冷野 ; 第二，屬於腸胃問題，大便不暢。

對應食物：水及綠色菜 🌿
食具清熱之效嘅芥菜、白菜，同高纖維蔬菜如芥菜、菠菜、潺菜。

3. 鼻、鼻樑 👃
主要係脾胃差，唔適宜食太多甜食、澱粉質、油炸、辣同酒，飲食盡量清淡。

對應食物 ：薏米、赤小豆

可健脾、祛濕熱✔️，用薏米、赤小豆煲粉葛鯪魚湯，或霸王花蜜棗煲瘦肉。

4. 背部
有啲人容易喺背脊生瘡，因為背部沿著脊髓兩邊，都係太陽膀胱經行走位置，如果膀胱濕熱就會出暗瘡。

對應食物 ：五花茶

內含金銀花、槐花，能對付因熱氣、胃火、腸熱引起嘅瘡疹。

對應食物 ：竹庶茅根馬蹄水
清膀胱濕熱，大人小朋友都啱飲👨‍👩‍👧 。

5. 面頰兩邊
肺熱會上炎去到面部，面頰就會生瘡，避免食煙、進行BBQ🥩 🍗同打邊爐等上火活動。

對應食物 ：龍井、抹茶
食完熱氣野之後飲，因2樣茶都較涼，有急救作用。

對付暗瘡迷思

1. 如果暗瘡分散面部唔同位置可以點處理🗣  ?

許醫師解釋，咁就可能心肝脾肺腎都有健康問題，要先清熱，食室溫嘅西瓜或雪梨。

如果想預防暗瘡，平時可食多啲青瓜🥒、冬瓜、苦瓜、西芹，假如生暗瘡情況嚴重，就唔適宜亂咁食，應該先睇醫生咨詢。

2. 有冇天然外敷方法治暗瘡 ？

暫時冇，但可以用西瓜皮🍉白肉地方清潔面上嘅粉刺同酒米，去油又有清涼效果。如果想預防暗瘡，清潔面部係最緊要。

3. 面上生疣係皮膚問題而唔係健康出現問題 ？

唔係，生疣係身體抵抗力差，平時最好早睡早起、多做運動🏊🏻‍♂️，從而改善體質，減少復發機會同加快痊癒。

熟女瘡係點嚟 💃🏻 ?

唔少女士過咗25歲，下巴、嘴邊位置都容易生暗瘡，古鎧綸醫師解釋，青春期嘅暗瘡通常係因為年少年盛，導致陰虛火旺 ;

但過咗25歲後生嘅熟女瘡，通常都係來自生活、工作壓力💢所造成，原因係脾胃濕熱，暗瘡就會生喺口角、下巴附近。

三大生活習慣因素形成熟女瘡

1. 瞓覺時間推遲

辛勞工作咗一日，雖然攰但更加想享受私人時間，瞓覺時間越推越遅，凌晨都未瞓。最佳瞓覺時間係晚上11至12時🕒，脾胃就會有足夠時間休息。

2. 不良飲食習慣

飲太多酒🥂、食過多油膩食物、經常食太飽、食無定時，都會令大便濕熱、尿色偏黃，增加生口邊瘡機會。

3. 腸胃問題

有便秘、胃酸倒流同口臭問題，建議食多啲粥水🥣清腸胃，同培養每日排便一次習慣。

想趕走熟女瘡，古醫師提議可飲以下溫和茶飲 :

紫背天葵茶 

有清熱解毒☠️、活血止血功效，但性寒，如易暈人士不宜飲用過多。加入山楂一齊煲，會更易入口。

酸梅湯 

特別適合經常熬夜、壓力大、高血脂、高膽固醇同容易精神緊張😠人士，多飲無妨。當中嘅烏梅可去肝火，山楂消滯。

以下藥膳食療符醫師可以推介俾大家🌞 :

枇杷菊花粥

材料︰枇杷葉10g、菊花6g、生石膏15g、大米100g。
製法︰將前三樣中藥用布包好，與大米🍚同放入鍋內煮粥，待粥煮成後，除去藥包即成。
服用方法︰每日1次。
鮮紅色皮疹，又痕又痛💫口罩瘡患者適用。

冬瓜水

材料︰生薏米30g、冬瓜500g、鮮馬齒莧30g。
製法︰將所有材料同時放入鍋內，加適量水，煲30分鐘即成👍。
服用方法︰每日1次。
暗瘡有膿皰患者適用。

資料來源

經常下巴生暗瘡? 中醫拆解25+的熟女瘡煩惱   古鎧綸中醫師

暗瘡位置揭示身體問題！拆解下巴、頸、額頭生瘡原因+對應清熱食物｜食是食非    許懿清中醫師

「口罩暗瘡」的防治    符文澍博士