醒腦提神  💫 工作讀書都自信過人 💪 

香港生活壓力大同節奏快，打工仔都想隨時保持最佳狀態😎，而家長想仔女健康之餘，亦會精靈過人，可以更專注應付到學業考試，以下幾位中醫師會為大家分享醒腦提神貼士✔️。

點解咁攰 ?

崔紹漢中醫師提出，疲勞可以由好多原因引起，通常都係因為體虛，如先天不足、勞累或傷神過度🥱、外在環境條件唔好、病邪過盛損傷正氣等。臨床辨證可分為氣虛、血虛、陰虛、陽虛、氣血兩虛、臟腑虛弱等，都係虛證。

中醫學說嚟講，徐澤昌中醫師解釋，如果想補腦去提昇人嘅精神狀態、記憶力、注意力同學習能力，亦要去補腎，因為人體氣血係咪充盈，同腎有好大關係。
 

假若五臟六腑之精充盈，則腎精充盈，令腦髓充滿🧠，腦部功能自然發揮得更好。想五臟六腑氣血充足，日常生活中，飲食要均衡、有做恒常運動、充足睡眠同情緒放鬆。

飲咖啡提神對工作好?

唔少人番工會一日飲幾杯咖啡提神☕️，但徐醫師指出，咖啡容易造成神經過分亢奮，出現失眠，令第2日精神更差，反而影響工作效能。
 

咖啡豆經炒焙處理，所以咖啡屬性偏溫，如果飲得過量，會令身體偏向燥熱，造成心胃上火。心火易產生口舌生瘡、心煩失眠或面赤口渴等症狀 ; 而太多胃火易會導致口乾口臭💢、牙齦腫痛、胃脘灼痛等症狀。
 

另外，咖啡有利尿作用，飲太多會利水傷陰，形成津液虧損，造成皮膚乾燥、乾咳、口渴等。

小朋友安神補腦湯水

如果家長想幫小朋友👧提神補腦，倪詠梅中醫師建議湯水食材要以清補為主，唔好用太熱氣嘅藥材如高麗參、鹿茸等，亦唔好用含有激素嘅補品如雪蛤膏、燕窩，以免過早刺激發育，引起內分泌失衡。
 

增強記憶力食物

補腦嘅食物多數同補腎有關，人參、淮山、遠志、石菖蒲、黑芝麻、柏子仁、茯神、龍眼肉、枸杞子、核桃肉、菟絲子、白果、大棗、丹參、澤瀉、地黃、五味子、杜仲、松子、腰果等都係常見嘅補腦食材。

安神食物 ❤️

養心藥物有安神作用，例如：珍珠粉、淮小麥、大棗、龍眼肉、柏子仁、酸棗仁、百合、蓮子、合歡花、玫瑰花、茉莉花等。
 

安神補腦湯水 （*以下2種食療適合小一或以上人士飲用）

< 醒腦狀元茶 >

材料：石菖蒲 5克，太子參 9克，蓮子 9克，紅棗9克。

做法：將所有材料加500毫升水煲半小時即成。

適合：易攰、思維唔清晰、集中力唔夠、難讀書入腦者。
 

< 珠母減壓湯 >

材料：珍珠母 15克，珍珠肉（或螺頭）15克，淮小麥10克，蓮子10克、百合10克，紅棗10克，瘦肉300克，薑3片。

做法：水滾後加入所有材料，大火煲30分鐘，再中小火煲45分鐘即成。

適合：易緊張、考試易失手者。

5大驅除疲勞食材 👋

1. 花旗參

味甘、微苦、性涼、有補氣養陰、清熱生津功效，有效抗疲勞同促進生長，啱熱性體質人士過勞後補充體力，可每次3克，用滾水沖開服用。

2. 北蓍

味甘，性溫，能健脾補氣💪，益氣固表，適合肺脾氣虛、畏寒人士，用30 至60 克北蓍沖水飲或煮粥。
 

3. 黃精

係補氣藥同補陰藥，味甘，性平，有養陰、健脾、潤肺、益腎作用，可對治脾胃氣虛或陰虛而致嘅倦怠乏力，持續服用能促進腦部功能。

4. 玫瑰花 🌹

味甘、微苦，性溫，可理氣解鬱、消除疲勞，活血散瘀同調經止痛。另外，玫瑰花藥性溫和，有效溫養心肝血脈，舒發體內鬱氣，達到鎮靜、抗抑鬱功效。

5. 薄荷

味辛，性涼，係常見香料，有疏散風熱、抗炎鎮痛、抗病毒、抗氧化等功效，薄荷茶亦可改善成年人嘅記憶力。

醒腦3穴位 💥

工作或考試心情太緊張，瞓得唔好，想醒腦、集中精神同減壓，徐醫師推介可以按以下3個穴位 :
 

百會穴

取穴：頭頂正中綫與兩耳尖聯綫嘅交匯點。

做法：用手指按摩百會穴，每次按順時針方向同逆時針方向各按摩50圈，每日3次。

風池穴

取穴：位於後頸部，後頭骨下，兩條大筋外緣陷窩中。

做法：用雙手大拇指指腹，揉按兩側穴位，約2至3分鐘。
功效 :  舒緩頭痛、頭暈同改善肩頸痠痛。

足三里穴

取穴：位於外膝眼下四横指、脛骨邊緣。

做法：每天用大拇指或中指按壓足此穴一次，每次穴按壓5-10分鐘，每分鐘按壓15-20次，注意每次按壓要令足三里穴有痠脹、發熱感覺。

功效 :  能調理脾胃、補中益氣、通經活絡、疏風化濕、扶正祛邪。

資料來源

咖啡提神out！中藥補氣不瞌睡     崔紹漢中醫師

5分鐘就能提神醒腦！中醫師的「6款DIY保健茶飲」：一杯薄荷茶，竟可改善記憶力、潤喉止咳    許琳、王恒蒼、吳娟娟、袁玉霞、黃露寧中醫師

【提神補腦】測考溫習增強記憶力更集中　中醫推介安神補腦湯水    倪詠梅中醫師

【溫書醒腦法】DSE開考在即咖啡提神易上火　中醫教食療＋按穴助考生醒腦寧神【內附食譜】   徐澤昌中醫師