四大流行排毒方法遂個睇👀 分享天然排毒食療😘

冷壓果汁、酵素同斷食排毒法近年越嚟越流行，但適唔適合你又有冇實際排毒功效 ? 註冊營養師同中醫師同你一齊探討下。

毒素是甚麼 ?

楊醫師指出，中醫角度嚟講，毒又稱為外邪👹，包括瘀血、痰濕、寒氣、食積 (即食太多而未能消化嘅食物) 同困熱等。如果毒素持續累積又冇定時排出體外，就會令氣血瘀滯，五臟六腑功能失衡，抵抗力下降⏬。

排毒 = 減肥 ? 🤔

楊醫師解釋，排毒並唔等於減肥，而係指幫助清除體內廢物。因為每人體質各有不同，所以排毒方法都會不一樣。

有需要為身體排毒 ?

彭醫師提出，如果係一個健康同有良好生活習慣嘅人，其實可以冇太大需要排毒，因為外來毒素進入人體後，會由肝腎解毒。

不過由於現代人生活壓力大，作息同飲食唔正常，令過量廢物，如自由基、宿便、尿酸、膽固醇或過量脂肪等積聚過多，引起唔少身體毛病，如口臭、便秘、舌苔黃、牙齦腫脹、眼紅澀、口腔潰瘍等，所以有需要掃走體內垃圾去排毒👊 。

以下係3種流行排毒方法包括果汁排毒、酵素排毒同斷食排毒，由營養師同中醫師同你一齊睇下 !

果汁排毒 🍇

冷壓果汁 VS 普通果汁

冷壓果汁價錢比普通果汁高幾倍，營養師吳瀟娜解釋，兩者最大分別係維他命C保存度，冷壓果汁主要用低溫與高壓技術，慢速切碎蔬果，再用高壓板擠壓蔬果，比起傳統果汁用高速榨汁機打汁，過程中產生更少熱力，令唔耐熱嘅維他命C更容易保存。

營養師提出，其實冷壓果汁同傳統果汁營養含量都係差唔多，但建議食原個水果更好💥，因為好多纖維、維他命都喺水果殘渣入面。

果汁可以排毒 ? 

營養師指出目前冇科學證據證明果汁有排毒功能，而其實營養學都冇排毒嘅講法，只要營養均衡，身體就會自然將廢物排出體外👍。
 

飲幾多果汁最好 ?

營養師建議成人每日限飲一杯（約二百四十毫升），小朋友限飲半杯（約一百二十毫升），飲用時最好加水稀釋果糖分量，而榨汁時可連水果皮一齊榨取。

酵素排毒

市面有產品標榜酵素可用嚟減肥、促進人體新陳代謝、血液循環、排走毒素甚至延緩衰老，究竟係咪咁 ?

營養師譚惠蓁指出，酵素產品唔會幫助到排毒。酵素係一種蛋白質，唔同酵素有唔同功能，如消化分解食物、於細胞內合成物質等，而產品內嘅酵素通常都係益生菌。

食完產品會肚瀉，有機會係因為人體內突然增加了益生菌所致，又或者加咗有輕瀉作用嘅藥，令人有錯覺好快排便係將毒素排出。

斷食排毒

斷食排毒法係指一段時間內唔進食固體食物，甚至完全唔進食，俾消化系統休息😪，重啟新陳代謝系統，幫助身體排出毒素。

香港乳癌基金會主席提出，其中嘅「5︰2輕斷食法」，屬於輕斷食，即係每周選兩天只攝取平日約四分之一熱量，其餘五天就正常進食。

但有有專家提醒，進行輕斷食嗰2日所攝取嘅卡路里太低，身體進入接近饑荒狀態⚡️，有可能出現低血糖、疲倦，建議身體虛弱、患低血壓、嚴重貧血人士都唔適宜進行。

彭醫師推介以下2個小菜，能有助清除體內垃圾 :

番茄豆腐豆芽湯 🍵

材料：番茄2 個、硬豆腐1 塊、豆芽半斤

方法： 水滾落所有材料至再滾，改慢火煮約1小時，調味即成

療效： 番茄紅素，具抗氧化能力，有效預防癌症； 而豆腐能清熱散血，對脾胃溫和，助排大腸濁氣
 

涼拌三絲

材料： 西芹絲4両、苦瓜絲4両、白蘿蔔絲4両、🍅番茄2個、蒜茸適量、鎮江醋、麻油、糖、豉油適量

方法： 西芹、苦瓜及白蘿蔔切絲，汆水晾乾備用；番茄切件，與三絲冷藏；食時拌勻調味料即成

療效： 能平肝降壓、清熱去脂；而苦瓜具解毒功能🌞，有助清除體內毒物。

資料來源

中醫教你5招身體排毒法 經常疲累作病＝體內積聚毒素多！ 楊明霞醫師
 

排毒踢走口臭便秘 中醫推薦6日排毒餐單 助清走體內廢物 彭明慧醫師
 

酵素減肥有用嗎？營養師拆解酵素功效、減肥謬誤及教你如何健康服用酵素   營養師譚惠蓁

有效助排毒？ 冷壓果汁保健迷思   營養師吳瀟娜

斷食與排毒   香港乳癌基金會主席霍何綺華