濕疹長久戰  內外一併調理勝算高 💪

春天來到，濕度上升💦，濕疹容易發作，有統計資料指出本港每5個人就有1人患上濕疹，患者通常會搽藥膏舒緩症狀，中醫其實喺治療方面都有唔同方法幫手，調理身體回復健康肌膚。

根據衛生署資料顯示，濕疹係冇傳染性嘅皮膚病，成因可能係遺傳、接觸過引起過敏反應嘅物質如灰塵、羊毛、花粉🌻、寵物嘅毛同皮屑，或食咗蛋白質食物如蛋、海產、奶類、牛肉導致。

即check濕疹嚴重程度

黃國威中醫師指出，濕疹可分為輕微、中等及嚴重程度，病徵亦各有不同 :
 

輕微濕疹
可能只係出現於身體1或2個地方，如手指🖐、手肘、耳仔、腳趾、膝後彎位同嘴角，皮膚只有輕微小水泡、乾燥或淺表皮損，假如患者作息正常，濕疹通常都唔會擴散或更嚴重。
 

中等濕疹
患處較多，可能有3至4個局部位置，患處會皮損更多、滲水、極度痕癢、脫皮，要開始接受治療，同時改善日常習慣。
 

嚴重濕疹
全身有唔同程度皮損，有大量細小紅點、大量滲水，入夜後痕癢加劇，瞓唔到覺，甚至會有水腫、惡寒發熱🔥、顫抖同情緒低落等表現。

張懷烈中醫師提到，西藥會以抗組織胺藥物同消炎藥物治療濕疹，可消炎止癢，但清除唔到過敏因素同改善抗病體質，所以患者容易復發。

中醫學看濕疹病因 🧐

而中醫會因應患者嘅病因、病機、體質同證型，運用唔同藥物同食療去治本，以下係４種常見濕疹病因：
 

1. 脾氣虛而濕聚

可用補益脾胃藥物同淡滲類中藥進行調補。
 

2. 肝胃火熱熾盛

患者需要清熱解毒，會用清肝胃火類中藥。
 

3. 濕盛中滿痰滯

要清熱去濕，從而清除患者體內嘅火毒、熱毒同濕毒。

4. 氣血虛夾瘀血

以益氣養血袪風💨為治療方向，令血虛改善，減少虛熱生風症狀。

李廣冀中醫師亦提到，濕疹係由多種内、外因素，引起淺真皮及表皮發炎，而發炎嘅「炎」字有兩個火💥，五行當中屬火，同「熱氣」好有關係。

而根據統計，超過六成濕疹屬於濕熱證型，都係因為患者長期飲食失調，生活作息唔正常，導致脾虛，形成濕氣，易引起皮膚炎症。另外，情志波動都會誘發濕疹，壓力會令肝氣鬱結、肝鬱化火。

中醫治療方法

想處理濕疹，可視乎嚴重程度來對治，黃醫師建議有以下3個方法 :

一、解表消水

對付嚴重濕疹，中醫會首先處理水腫同發冷❄️症狀，會用發散風寒嘅中藥來驅散寒邪，再加上利水滲濕紓緩水腫。

二、清熱解毒、大補氣血

消除水腫及發冷後，就要開始清熱解毒同大補氣血。清熱解毒係為咗消除皮膚感染同體內濕毒 ; 而大補氣血就係提升自我復修能力，加速皮膚康復進度👍，以正氣抑制濕疹。同時外用中藥預防感染，避免併發其它皮膚病。

 

其他方法

刺絡放血療法
李醫師解釋，濕疹患處紅腫熱痛，係因為瘀血🩸積聚。此療法會用使用三菱針、梅花針敲打患處，再用拔罐吸掉瘀血，從而釋放體内熱毒，達到減壓、消腫、止痕三個功效。刺絡放血療法成效迅速，中度至嚴重濕疹患者都適用。

營養師戒口貼士

中醫會建議患者少食煎炸、刺激性食物、濕熱食材，而註冊營養師謝詠瑩亦提到，以下食物含有高組織胺，會加劇皮膚痕癢，最好少食 :
 

• 部分蔬菜：蕃茄、菠菜、南瓜、茄子 🍆
• 柑橘類食物（例如橙）、奇異果、檸檬、士多啤梨等
• 發酵食物：泡菜、榨菜、芝士、金華火腿、麵豉、皮蛋、鹹蛋等
• 深色魚類：沙甸魚、鯖魚等

濕疹患者戒口時容易缺乏某類營養素，營養師提醒要由其他食物中攝取。

缺乏鐵質

患者若要戒吃牛肉、海產類（例如：蜆肉、青口、花甲、生蠔），或較易缺乏鐵質。

建議：可食多啲綠葉蔬菜，如羽衣甘藍、莧菜，或添加咗鐵質嘅早餐穀物片​​​​​。
 

缺乏鈣質

患者若唔飲牛奶🍼或豆奶，或較易缺乏鈣質。

建議：可飲用燕麥奶或米奶；進食有骨魚類，如白飯魚；進食綠葉菜，如菜心、芥蘭。

預防濕疹8大食物

曾覺知中醫師建議想預防濕疹，推介以下6款食材 :

1. 土茯苓

味甘，性平，可清熱、解毒祛濕、止癢的功效，但肝腎欠佳要注意用量，唔可以同茶一齊飲。

2. 生薏仁

即生薏米，性微寒，可利水滲濕、健脾、清熱排膿。🎯

3. 綠豆

味甘，性寒，可清熱解毒，消暑利尿、消瘡。

4. 扁豆

味甘，性微溫，適合脾虛聚濕人仕，能健脾、祛濕、利尿，對治濕疹患者嘅脾虛同濕重問題。
 

5. 牛蒡

味辛，性寒，可以疏散風熱，解毒散腫。

6. 粟米鬚

味甘，性平。平時可以粟米芯配粟米鬚加水煮45分鐘，有助排出體內熱氣、濕氣，可消腫減肥，改善濕熱體質🙌。

2款紓緩濕疹湯水

健脾化濕固本湯（一人份量）

材料：茯神1兩、生薏米1兩、玉米鬚8錢、淡竹葉3錢、北芪5錢、生白术1兩、車前草8錢、陳皮3錢、紅棗3粒（去核）

方法：用8碗水，煎取2碗即成

功效：改善脾胃虛弱、濕氣情況，適合容易復發濕疹患者

清肝降胃解毒湯（一人份量）

材料：冬瓜半斤、魚腥草5錢、大飛揚1兩、土茯苓1兩、白花蛇舌草3錢、荷葉1張、鑽地老鼠5錢、生地1兩、生甘草3錢

方法：用8碗水，煎取2碗即成

功效：清肝降胃，適合肝胃火熱，皮膚滲出黃水患者

資料來源