虛火實火點分 ? 飲涼茶一定有用 ? 🍵

食得熱氣野多🍟🍤🥠，有機會出現便秘、喉嚨痛、生暗瘡、牙肉腫痛等，你會覺得自己好熱氣，究竟中醫角度嚟講咩叫熱氣 ?
飲啲咩可以清熱 ? 坊間嘅清熱方法又啱唔啱 ?

上火類型 🔥

潘咨遐中醫師指出，中醫稱「熱氣」為上火，通常指進食薯條、咖喱等煎炸、辛辣食物後，出現熱性症狀。火亦分實火同虛火兩種，下火方法都唔一樣，首先要分清楚係邊種火再對正下藥，因為如果唔理會類型就飲廿四味，可能會加重熱氣症狀 ⚠️。

虛熱

潘醫師解釋即係陰虛火旺，而唔係真係上火，大部分陰液被消耗，導致體內陽較多而陰不足，病因係長期捱夜同少做運動。患者會面紅、手心腳心熱、咽乾、舌苔紅😛、口苦、失眠多夢、牙痛同乾咳少痰，需要滋陰降火，可飲用花旗參麥冬茶。

實熱
稱為陽亢，陰氣正常，只係陽氣上升，出現實熱唔舒服症狀，病因主要同飲食有關，食太多燥熱同辛辣🌶食物，症狀有牙肉腫痛、面紅、口乾、口臭、生「痱滋」、喉嚨乾或痛、牙肉腫痛、生暗瘡、流鼻血、小便黃同赤熱、便秘，飲綠豆水能有助清熱下火。

五臟有火

火係可以出現喺唔同臟腑，上火原因有外感、七情過激😡、飲食不節或勞累過度所致，潘醫師提到，熱氣可對應五臟心、肝、脾、肺同腎。
 

1. 心火

病因：經常心情煩躁、吃辣、煎炸、熱氣食物同捱夜

心虛火表現：低燒、盜汗、心煩、口乾等

心實火表現：反覆口腔潰瘍、口乾、小便短赤、心煩易怒等

2. 肺火

病因：感受外邪，或食熱氣食物
肺虛火表現：乾咳無痰、痰中帶血、咽疼音啞、潮熱盜汗等
肺實火表現：咳黃痰或濃痰、口乾、喉痛、舌苔發黃、小便黃、便秘 😅

3. 胃火

病因：食滯、嗜酒、嗜食辛辣、食重味同滯胃食物

胃虛火表現：輕微咳嗽、飲食量少、便秘、腹脹、舌紅、少苔

胃實火表現：上腹不適、口乾口苦、大便乾硬
 

4. 肝火

病因：經常捱夜

肝虛火表現：手腳心發熱、夜晚出汗💦、身體消瘦

肝實火表現：頭暈脹痛、眼睛紅、面紅、口乾、反復口腔潰瘍、小便短赤（量少，深黄）、心煩易怒、大便乾
 

5. 腎陰虛

病因：經常捱夜，或病後缺乏調理導致體虛

腎陰虛表現：腰膝痠軟、眩暈耳鳴、失眠多夢、男子陽痿、遺精、婦女經少閉經或崩漏、形體消瘦、潮熱盜汗

生痱滋就係熱氣?  點解會反覆生 ?

好多人都試過生痱滋，可以唔駛食藥而自行好番，但何肇婷醫師提到，有患者就算停止咗食辛辣煎炸食物，都仍然會生，甚至經常復發，係咩原因 🤔 ?
 

中醫稱痱滋為口瘡，即係口舌生瘡，患處會有紅腫、灼熱及疼痛感，惡化時口瘡潰瘍有可能面積增大，數量增多，令康復時間延長，影響患者說話同飲食，會有流口水情況。

何醫師解釋，成日番發生痱滋同體質有關，通常係陰虛火旺同脾胃虛弱⚡️ :

陰虛火旺 - 患者喺太勞累同食煎炸食物後誘發口瘡，痛楚較大，同時會覺得好攰、精神唔好、冇胃口、心煩失眠、手足心熱。建議用滋陰降火方法，服用生地黃、麥冬、玄參等藥材。

脾胃虛弱 - 痱滋痛楚較輕，少少紅腫，會冇精神😴同瞓得唔好。黃芪、黨參、白朮等中藥能健脾溫脾，再加上清熱藥如黃連、黃柏，就能減輕痛楚。

飲涼茶有用 ? 🍵

涼茶由寒涼藥物煮成，身體壯實人士夏天可以飲用，但陰虛火旺或脾胃虛弱人士飲涼茶，即使口瘡會有輕微減退，不過其實並冇根治體質問題，最後口瘡會反覆發作。

何醫師陰虛火旺人士可製作花旗參麥冬茶飲用 :

3克花旗參及10克麥冬煮半小時，加入適量蜜糖🍯調味即成，一星期可飲用1至2次。花旗參能滋陰補氣，麥冬能養陰生津、潤肺清心，間唔中飲下都有預防作用。

 清熱氣5個謬誤

 下火驅除熱氣，坊間都有唔同方法，究竟邊啲係有效，邊啲未必適用 ? 由許懿清中醫師同你解答。
 

1. 食炸雞時飲啤酒🍻可以清熱氣？

啤酒性質雖然寒涼，但係清唔到熱氣，反而會影響脾胃功能。脾胃係人體嘅抽濕機，如果功能減弱就會令身體濕氣過重，會影響睡眠同免疫力下降。食完炸雞飲啤酒，會令熱上加濕，個人更唔舒服。
 

2. 食完炸雞，飲涼茶就能下火 ?
係可行，但唔建議❌經常咁做，因為身體反復積熱都係會受到傷害。

3. 食熱氣食物，加西檸汁、茄醬，就可減少熱氣 ?
從中醫角度，西檸汁及茄醬並無清熱功效。

4. 炸物灘凍再食，會冇咁上火 ?
炸物炸完剛離開油鍋，熱氣較重，等涼啲再食，係可以減輕熱氣，但唔係唔熱氣。

5. 天氣如果較涼，多食熱氣食物都無妨？
熱唔熱氣主要唔係睇天氣而係睇人當時嘅體質，寒性體質間渡中食一兩次熱氣食物，健康唔會有太大影響，如屬熱性體質，體內本身熱氣已經較重♨️，就要少食為妙。

資料來源
 

中醫教室｜熱氣分2種虛熱失眠實熱便秘　清熱食療廿四味非人人啱    潘咨遐中醫師
 

拆解謬誤﹕炸雞抗寒？啤酒下火？    許懿清中醫師
 

生痱滋 一定係熱氣？    何肇婷中醫師