🌟十種袪濕大法 邊招最有效?🤔

每逢春夏之間，天氣特別潮濕，除咗會有濕濕漉漉嘅感覺之外，亦都好容易攰，冇嚟精神，做嘢都提唔起勁！如果你都有呢種感覺，可能係體內濕氣💦積聚。坊間流傳有好多唔同袪濕方法，邊啲真係有效？邊啲方法用咗可能會傷身？

彭明慧中醫師指出，人體自身出現嘅濕邪，同肺、脾、腎關係密切，通常都係脾胃功能差👎，令水液積於體內而形成濕邪，濕重人士有以下特徵 :

脾虛 ：影響脾胃運化，令人肚脹、冇胃口、腹瀉、大便稀爛、嘔吐

腎虛 ：影響下肢、排泄物同分泌物，可能出現腳腫🦵、小便量多、混濁，女士白帶量多等情況

盧肇聯中醫師指出，濕邪亦分2種 :

寒濕 - 面色蒼白、疲累乏力、怕凍
濕熱 - 經常面紅、嘴唇紅，大便比較臭、頻流汗但無助散熱 🥵

10 種袪濕方法 邊種先啱係？

1. 麻辣火鍋

寒濕有效 ✔️
麻辣火鍋有花椒、八角、辣椒🌶等性味辛溫食物，有助行氣，加上食時排汗、食後排泄，都有助袪濕

濕熱無效 ❌
濕熱人士食麻辣火鍋會「熱上加熱」，令症狀更嚴重，如大便稀爛、惡臭、大便排唔乾淨

2. 袪濕湯包

濕熱有效 ✔️
袪濕湯包常見藥材，如赤小豆、生薏米、木棉花、澤瀉等性質偏寒🥶，可配合茯苓、扁豆等平性健脾袪濕藥材，清熱利濕

寒濕無效 ❌
清熱利濕湯包，對寒濕人士不適用
寒濕人士可以茯苓、扁豆衣、雲苓、白朮等平性藥材煲湯。亦可多用金盞花，粟米鬚，羅漢果焗水

3. 生薏米、紅豆、赤小豆或黑豆水

濕熱有效 ✔️
生薏米性質偏涼，適合濕熱人士，加上淡竹葉去煮，可加強袪濕功效。或簡單加入炒過既薏米 ( 即熟薏米) 互相平衡

寒濕有效 ✔️
紅豆養血、赤小豆利濕，黑豆幫助排便，性質平和，有助健脾袪濕

4. 戒凍飲、生冷食物 🍨 🍦

寒濕、濕熱都有效，少食可避免傷脾，令運化內濕回復正常

5. 日本腳貼 🦶

內含「竹酢」成份，但唔係中藥，標榜可以袪濕。用時將腳貼貼喺腳底貼一晚，第二日貼布會濕透及變色，代表已袪濕，但亦有可能因為排汗而整濕，功效成疑。

6. 暖薑水浸腳

寒濕有效 ✔️
薑屬溫性，有行氣作用，加入暖水中可加強功效
可將暖水倒入水桶中，放入一両薑皮，讓雙腳膝頭以下位置浸入暖水中，薑皮能袪水腫。肝、脾、腎經行經足部，暖水浸腳可加快經絡氣血循環，有很好的保健之效

濕熱無效 ❌
可以不用薑，只用暖水浸腳

7. 艾灸

寒濕有效 ✔️
艾灸所用嘅艾條，成分為艾草🍃，性質偏溫，有助通經絡

濕熱無效 ❌
濕熱人士做可能引致燥熱，引致生暗瘡、喉痛

8. 抽濕機

寒濕、濕熱都有效 ✔️
睡前在睡房開抽濕機，睡覺時可停，保持睡房乾爽舒適

9. 拔罐

寒濕、濕熱都有效 ✔️
拔罐有溫經通絡、袪濕逐寒、行氣活血同消腫止痛作用

10. 運動排汗

寒濕、濕熱都有效 ✔️

運動可以增強經絡氣血循環，強化心肺同肌肉⚡️，而脾主肌肉，強健肌肉亦有助健脾，做完運動後，濕重症狀多會減輕或消失，令人感覺精神爽利。

要袪濕，就要先健脾🌟

梁軒偉醫師指出 "要袪濕，要先健脾"，因為喺中醫角度，脾主運化水液功能，即係脾負責將嚟自食物嘅營養帶到全身。如果天氣又濕又熱，脾功能容易失調，營養水液💧就會停滯，形成水腫，所以想袪濕，就要脾臟先運作得好

檸檬薏米水 🍋

而家流行DIY檸檬薏米水，有美白消水腫功效。

材料 : 生熟薏米 各 50 克、水 2 公升（包括浸薏米水）、檸檬 1 隻、蜜糖隨意
 

方法 ：
1. 將生熟薏米洗淨，然後浸水中 1 小時備用。
2. 大鍋中加入生熟薏米同浸薏米水，再加水至 2 公升，滾起後，加蓋轉細火煮 1 小時。
3. 薏米水放涼至和暖先加入檸檬汁或檸檬片，再加入蜜糖即成。
 

提示 ：
檸檬同薏米唔好一齊煲，因為高溫會破壞檸檬嘅維他命 C，而且檸檬皮煲完後亦會有苦味。
 

冬瓜薏米水

有消暑袪濕功效。

材料 : 冬瓜 600 克、生熟薏米 各 60 克、鹽少許

方法 ：
1. 將生熟薏米洗淨，然後浸泡水中 1 小時備用。
2. 薏米同冬瓜皮加入適量清水，以大火煮滾。
3. 煮多 30 分鐘後，將冬瓜皮取出。
4. 加入冬瓜粒，繼續煲 1 小時，瓜粒會溶化入湯水中。
5. 熄火前可以加入極少量鹽調味即成。

資料來源

你要知：祛濕多謬誤 食辣椒冷氣抽濕統統錯    彭明慧中醫師
 

中醫點評十大法寶 「濕鬼」纏身 袪濕分清寒熱   盧肇聯中醫師
 

生熟薏米水功效多！中醫講解飲用薏米水袪濕消腫    梁軒偉中醫師