風濕發作係因為身體太多風同濕 ?  💦

風濕俾大家嘅印象都係番風落雨先會發作，究竟係唔係咁 🤔 ? 病發時帶來痛楚之餘亦為生活帶來不便，中西醫喺風濕治療上可以點舒緩 ?

風濕病成因及病徵

風濕科專科葉文龍醫生指出，風濕病同自身免疫系統紊亂💢有關，係後天因素，身體會產生抗體，攻擊唔同嘅器官，如抗體攻擊自己嘅關節，就會患上類風濕性關節炎 ; 紅斑狼瘡症患者，抗體可能攻擊腎臟、肺或者肝，就會有相對器官炎症發生。

風濕病關節炎同一般勞損唔同❎，痛楚會喺早上睡醒或休息過後會更劇烈，甚至有晨僵現象。而勞損性關節炎，休息後通常都可以舒緩症狀。

西醫治療風濕病

葉醫生提出，風濕病治療都係以針對免疫系統💪為主，患者需要長期服用風濕藥，如生物製劑或標靶藥。生物製劑係生物科技製造嘅抗體，可影響發炎因子，從而減輕炎症導致嘅關節紅腫熱痛 ; 口服標靶藥係一啲小分子藥物，容易進入發炎細胞內，能抑制細胞核製造發炎因子。

日常生活中，葉醫生建議患者可多做運動，如游泳👙或水療，有助提昇關節柔韌性，減慢肌肉出現萎縮。另外，患者要小心服用聲稱能增強抵抗力嘅保健品，避免令免疫系統更混亂😩。

應用中西醫合璧治療風濕，可互補不足，西醫主要控制病情，中醫則調節體質、情緒同紓緩西藥嘅副作用，令診斷及治療更全面。

中醫角度看風濕

陳國正中醫師講到，風濕係由外因造成，大自然氣候變化存有六氣：風、寒、暑、濕、燥、火🔥。如任何一種元素過度影響人體，都會令人作病 :

過量風邪 – 痛楚遊走不定或症狀突然發作
過量濕 – 需要長期治理，難根治
多風、寒❄️、濕 – 引起強直性脊椎炎風濕病
多風、寒、濕、火 – 導致急性類風濕性關節炎

而一般風濕病，大部分都會有風、寒、濕嘅特性，發病時間通常好突然，亦可能同一時間好多部位都會疼痛，只能由提升體內正氣去治療。

陳醫師解釋，正氣🌈係自我修復及抗禦外邪嘅能力，當人體處於正氣不足，就唔可以驅除病邪。正氣先虛原因有勞累過度、作息唔好、久病、年老體虛，又或因肢體關節曾受外傷，令外邪易於侵犯。

中醫治療方法

當身體啟動自我修復功能，就可提升大量正氣⬆️，病邪相對地就會顯得微小，而其中一個方法係針灸，以針調動關節患處附近穴位嘅氣血，梁秋容中醫師建議針灸膝部嘅血海穴，有助袪除風濕寒邪，以回復氣血通暢🩸。

風濕病正虛係主因，如只袪邪而不顧扶正，病會更難好，甚至會惡化。平時建議做八段錦、太極、五禽戲等運動，有助保持經脈氣血流暢，令關節處於強健狀態，病邪就難以入侵。

注意飲食都能改善風濕症狀，避免受寒或惹濕，守護脾胃係十分重要，要避免進食過量寒濕食物，如螃蟹、綠茶、雪糕🍨等。亦要盡量保護背部嘅風門穴，去到冷氣或風口地方，要披上披肩或穿上外套做保暖。當想為身體驅風，可按壓風池穴，有助驅走風邪。

藥膳推介
 

補腎壯腰湯 🍵

材料 : 杜仲三錢、懷牛膝三錢、巴戟天三錢、狗脊三錢、黨參四錢、黃耆三錢、豬脊骨半斤
做法 : 將所有材料加清水六碗，大火煮滾後用細火煲兩小時，放鹽調味即成
功效 : 補腎壯腰、調氣血、強筋骨、舒緩關節痛。
 

防風苡仁粥

材料 : 防風5-10克、薏苡仁15-30克、砂糖適量 (可不加糖)
做法 : 將防風水煎取汁，加薏苡仁煮成粥，最後加砂糖調味即成，趁暖進食
功效 : 有效祛風除濕，適合類濕風關節炎有早期症狀患者。

資料來源

破解「風濕」迷思    梁秋容中醫師

【風濕病系列】痛不欲生靠中醫針灸 配合西藥更可以治本  陳國正中醫師、風濕科專科葉文龍醫生

「風濕痛」中醫食療  香港大學中醫藥學院教學助理林蓓茵博士