關節痛症唔難搞😉 介紹中醫7大治療方法 🙋‍♀️

任何年齡嘅人都可能患上痛症，西醫方法係做物理治療同食藥舒緩，近年不少患者為咗治本，會配合埋中醫治療，本文會詳述痛症原因同多種治療方式。

中大香港健康情緒中心研究報告顯示，香港每十人中便有一人（約七十萬人）係痛症患者💢，而五成港人喺過去一年至少患有一種痛症，常見痛症包括頭頸痛、肩周炎、腰背痛、網球肘、腕痛、膝痛，女性、長者、失業同退休人士係主要患者，以患上肩頸背痛居多。

點解會出現痛症 ?

邵益璋醫師提出，中醫有「通則不痛，痛則不通」理論，當外邪（風、寒、濕、熱🔥）入侵同正氣不足，人體經絡就會不通，氣血運行受阻，引致疼痛、麻木、關節紅腫及屈伸不利。
 

痛症除咗因外傷而導致嘅急性疼痛，大部分香港人患嘅痛症都同年老體虛、姿勢不良、長時間重覆動作、或長時間處於空調冷氣、缺乏運動有關。

痛症3大證型 🙌

李晋豪醫師指出，痛症常見證型有 :

風寒濕痹型
痛點會游走不定，劇烈疼痛，惡風惡寒，令肩頸背部痹痛。

氣血虧虛型
四肢麻木、精神差、容易攰、頭暈😵、面色蒼白、心悸氣短。

肝腎虧虛型
腰膝酸軟無力，肢麻頸痛，伴隨失眠多夢、耳鳴、頭痛。

常見關節痛症及原因
 

李啟霞醫師詳列同解釋以下常見關節痛症 :
 

１）肩頸疼痛

病因 : 長時間低頭工作

頸椎神經同血管組織長期受壓，引致手腳麻痺、頭暈頭痛，嚴重者可致頸椎錯位，令肌肉無力及萎縮⚠️。
 

２）寒凝肩

病因 : 患者體質虛弱，令陽氣不足、氣滯血虛，肌肉筋骨唔夠營養。

亦稱五十肩，多於五十歲發病，肩關節會疼痛，手唔能夠高舉，影響日常活動。
 

３）腕管綜合症

病因 : 長時間用電腦、手提電話🤳或拎重野，因重複手腕活動太多，致手部肌肉勞損而發病。

亦稱滑鼠手，患病初期手指麻痺，嚴重時痺痛會蔓延到手臂同肩膊。

４）腰背痛

病因 : 有可能係腰椎間盤突出、骨質疏鬆

腰痛不適、四肢麻木、兩膝酸軟冇力，唔可以行得遠，有時小腿同大腿都會痛，甚至唔可以躺臥同轉身。
 

５）膝痛 🦵

病因 : 膝關節軟骨退化、年齡增長引起慢性炎症反應

患者會出現膝部肌肉僵硬、疼痛、腫脹、發熱，上落樓梯時最痛，病情嚴重時會導致膝關節變形。
 

６）腳跟痛

病因 : 勞損、腳跟患有骨刺、脂肪組織炎或筋膜炎

常見於中老年人👨‍🦳，腳跟痛容易反覆發作，造成行動困難。

中醫對治痛症方法

中醫治療痛症，通常會使用兩種或以上方法去疏通氣血經絡、鬆解肌肉緊張、糾正關節錯位，邵醫師介紹以下方法 :

推拿

以外力令患者直接放鬆肌肉，首先升高🔼 局部組織穴位溫度，加強循環，將緊張嘅肌肉充分拉長去緩解痙攣及疼痛。

針刺及艾灸

根據疼痛部位去取穴，溫和刺激穴位，令氣血回復正常運行、經絡通暢。

如風寒濕痺症會用平補平瀉法，再同時使用拔罐或灸法 ; 若是熱痺證，可用瀉法。
 

🟣 穴位方面，上肢常用肩髃、肩貞、曲池、外關、合谷。

下肢可取環跳、秩邊、陽陵泉、犢鼻、承山、太溪、丘墟、昆侖。
腰背痛可用華陀夾脊穴、腎俞、腰陽關、委中、關元、腰眼、太溪。
 

電針

要先用針刺得氣，再做電針，針上有接近人體生物電嘅微量電流，直入肌肉深處，用穴位同電流兩種刺激方法來做治療。

遠紅外線頻譜儀

增加局部肌肉血流量，有熱敷效果，能放鬆肌肉👍。

刮痧及拔罐

透過令毛細血管破裂，加速排出體內廢物同毒素，加強新陳代謝。

中醫整脊復位手法

通常係用咗其他方法後最後先用嘅療法，當肌肉更放鬆，就更容易糾正關節錯位。
 

內服中藥

服用中藥可溫經通絡、調節身體陰陽氣血🥰，李啟霞醫師建議，關節痛症應以疏通經絡同氣血為主，採用祛風、散寒、化濕或清熱等治法。
 

常用於治療關節痛中藥有杜仲、牛膝、桑寄生、獨活、羌活、桂枝、金狗脊、威靈仙、續斷、細辛、海風藤、雞血藤、絲瓜絡、川木瓜、防風、葛根、北耆、當歸、川芎、田七、秦艽、茯苓、海桐皮、地龍、烏梢蛇。

資料來源

【醫師文集】中醫綜合療法治療痛症   邵益璋中醫師

【醫師文集】中醫綜合療法治療痛症（續）  邵益璋中醫師

漫談關節疼痛的中醫療法   李啟霞中醫師

肩頸背痛 中醫有辦法  李晋豪中醫師