🤰孕婦飲食+運動禁忌大搜查 🙆

坊間流傳，孕婦有各種飲食禁忌，聽落好似好多野都唔食得，做運動又高風險，但事實係唔係咁 ? 有註冊中醫師同我哋睇真啲~

Q1 一個人食兩個人野，對胎兒最好 ?

唔係，李廣冀醫師表示，懷孕期間一直維持正常食量就可以，去到懷孕中後期，食量先會開始上升。最重要係飲食均衡，盡量唔食❌有添加劑嘅食物，留意澱粉質🍙同糖份攝取，避免懷孕後期出現妊娠糖尿同血糖上升問題。

Q2 懷孕期間，如果食太多深色食物如朱古力🍫，BB第時皮膚會深色啲 ?
 

唔會，皮膚顏色係由基因決定，同進食食物嘅顏色冇關係。但係如果孕婦食太多煎炸野、海鮮🦐、重口味或是辛辣食物，BB皮膚易變差或敏感，增加出生後患上濕疹機會。
 

Q3 孕婦樣樣生果都食得 ?
 

唔係，李醫師提醒，唔好食太多寒性水果如雪梨、西瓜🍉、火龍果 ; 同時要避免濕熱水果如芒果、榴槤同菠蘿🍍。

Q4 食話梅、山楂等酸甜零食對胎兒冇害 ?
 

係，不過古鎧綸醫師建議，要選擇少防腐劑或化學成份零食，而話梅、咸檸檬🍋、陳皮等都比山楂好，因山楂消食力強，食太多會阻礙營養吸收。

古醫師提出，孕婦喺唔同懷孕週期都有飲食禁忌🙌：

12週以下：以安胎為主，唔好食通便利尿食物或藥物，忌食引致輕瀉嘅水果（如西梅）

12週後：可放心食適量生冷寒涼食物❄️，如西瓜等，紓緩孕婦燥熱不適，不過要任何時間戒魚生同雪糕。

36週後：可以開始清胎毒，對嬰兒日後皮膚有幫助👍，可飲白蓮鬚、腐竹糖水、果汁，一星期1至2次就夠。切忌盲目清熱，導致早產。

李醫師推介以下2款安胎湯水🍵：

<蓮藕章魚湯>

材料：蓮藕 100克、淮山 100克、花生 20粒、章魚乾🐙 1塊、雞 1隻、生薑 3塊、水 1公升

做法：水滾後放入所有材料，大火滾約15分鐘，再慢火煲約1小時，適量調味即成。

功效：補充體力、益氣養血、健脾上奶🍼，又唔太熱氣

禁忌：有濕疹孕婦不宜飲用。

<竹絲雞湯>

材料：竹絲雞🐔 (烏雞) 半隻、瑪卡 3粒、南棗 4粒、淮山數片

做法：大火煲滾所有材料同水，再慢火煲約2小時，適量調味即成。

功效：黑色雞可補腎，比黃雞（普通雞）較補而不燥，預防產後脫髮👩‍🦱。

孕婦可以做運動🚴🏻‍♀️? 高齡孕婦都可以做 ?

孕婦除咗可以用食材安胎，做簡單運動都係一個好方法放鬆身心。而家越來越多女士過咗30歲先懷孕，高齡孕婦又可唔以做運動 ? 會唔會危險 ?
 

陳鈺萍醫師指出，年齡同生產風險未必有關係，只要身體狀態良好，25歲同40歲有BB，做運動都係冇問題💁🏻。美國婦產科醫學會（ACOG）更提醒，成日唔郁嘅生活方式可能會影響孕婦健康，所以鼓勵孕婦運動。

以下係好多孕婦嘅疑問，由陳醫師一一解答🗣：

Q1 孕婦運動只能散步🚶🏻‍♀️、做瑜伽？

只要唔係患有高風險疾病，基本上大部分運動都可以做。好似有行山、慢跑習慣嘅孕婦，能夠繼續做但要調整運動量。不過一啲運動環境高壓或低氧嘅，如潛水、登高山🧗🏻‍♂️，就最好避免。

Q2 孕婦唔可以拎重物？

一般孕婦，係可以✔️，但如果係有早產風險嘅孕婦，腹肌出力動作，會刺激子宮收縮，就唔建議。

Q3 做運動時，BB心跳都會跟住加快？會唔會有危險？

唔會有危險，媽媽心跳❤️唔會直接影響BB，但做運動時會間接令BB郁動，令BB心跳有少少加快，但仍然安全。

Q4 生完後再做運動更好？

唔係，如果由備孕、懷孕已經有運動習慣，生BB嘅時候難度會減低啲，身形喺產後都會能快啲恢復💯。

資料來源
 

吃兩人份量？不可吃海鮮？中醫拆解懷孕5大謬誤 李廣冀中醫師

一圖睇晒孕婦飲食禁忌 點解要戒香蕉薏米？古鎧綸中醫師

高齡懷孕也可以運動？醫師破解5大孕婦運動迷思 婦女醫院婦產科醫師陳鈺萍