坐月坐得好👍 氣血足夠冇煩惱 

西醫並冇坐月說法,西方女性往往一生完BB,已經會洗頭、出街甚至吃生冷食物,同華人習慣大不同。
中醫學說強調坐月嘅重要性,需要補充營養令身體及子宮復元,廖芳儀醫師為大家介紹坐月兩大階段 :

第一階段:化瘀血、生新血 🩸

呢一個階段,主要係幫助產婦排清惡露,舒緩傷口痛。順產嘅媽媽可以服用生化湯嚟復原🔮,飲3至5日最好 ; 開刀生BB嘅就唔一定要飲,因為手術過程中,大部分惡露已經被清理。

 

第二階段:健脾、調理氣血、補養肝腎

當子宮經過第一階段,狀態稍為恢復,就可以透過增強腸胃吸收同補養肝腎,將生BB時流失嘅氣血補番,恢復體力💪。另外,呢個階段係一個調理懷孕前體質嘅一個黃金機會,如類似貧血、過敏體質、腰痠、月經失調等情況,都可以順便保養一下。

中藥產後調理,對BB都有益處 👶 ?

2016年臨床研究發現,餵人奶期間,媽媽有用中藥保養,BB患上黃疸機會較低,而進食四物湯等補藥亦唔會影響嬰兒發育情況。

中醫師會針對每一位產後媽咪體質,建議唔同嘅配方。虛寒體質會加強補養氣血,燥熱體質會用不上火食材💥,懷孕時有腰痠情況,就增強筋骨調養。

坐月調理6大謬誤

黃志東醫師指出,坊間流傳咗唔同坐月習慣,究竟邊啲係有根據 ?
 

1. 唔可以沖涼洗頭

"生完BB一個月後自可以洗頭沖涼💦,如果唔係會易受風邪、濕邪侵襲。"

唔啱,產後保持衛生好重要,長期唔沖涼洗頭反而令細菌滋生。只要用暖水洗同注意保暖就可以。

 

2. 唔可以吹風扇、開冷氣

"生完BB身體虛弱,吹風會增加感冒、肚瀉風險。"

部分正確。婦女分娩後係會較易受風寒,但如果太熱,流汗後吹風仲易感冒🤧
黃醫師建議,室溫最好保持適中,令坐月媽媽覺得舒適,只要唔係直吹冷氣或風扇就冇問題。

 

3. 唔可以飲太多水 🥛

"產後婦女通常都係有水腫,有傳飲水會減慢排水進度。"

唔啱。生產之後,身體會自行排出產前儲存嘅水分,所以飲水同排水係冇關係🙅‍♂️,而缺水反而會引起健康問題,建議婦女可飲暖水補充。

水腫 ( 圖片來源 : 華人健康網 )

 

4. 應多喝酒補身


"酒精有助驅寒活血,所以坐月時堅持每日飲雞酒,或以米酒煮藥膳。"

部分正確。酒精
🍺唔係適合所有產後女士,特別係雞酒、米酒藥膳都偏向燥熱,有傷口或惡露未清女士更唔適合服用。另外,如酒精濃度過高,可能會由人奶傳開令BB過敏。

 

5. 唔可以食水果


"認為水果生冷寒涼,唔適合產後婦女食用。"

 

部分正確。水果🍓有豐富營養,進食有助傷口癒合,只需要選擇合適屬性水果嚟食就可以。盡量避免食西瓜🍉、西柚等寒涼水果,以免延誤康復進度,建議食蘋果、提子、橙等平性水果。

 

 

6. 一定要吃五更飯


"五更即係凌晨3點至5點,傳統認為呢個時間食飯能補中益氣,有利脾胃。"

 

唔啱。食五更飯🍚原意係幫助上奶,調理身體。但如果勉強媽媽起身食飯,反而會有反效果。

雞酒 ( 圖片來源 : ytower.com )

坐月餐單要注意 🍽

唔進補過量

唔少人認為婦女生完BB失血,元氣大傷,要用貴重補藥,先係對身體好。不過許素芳醫師指出,進補過量唔止會致肥👻,亦會阻礙脾胃運化、影響食欲同消化吸收。

坐月時應就個人體質去循序漸進調理身體,以清淡富有營養為主,要少食多餐,同時多飲湯水,有利於乳汁分泌🍼

生冷、辛辣食物傷脾胃

坐月餐單應禁食生冷、寒涼食物,呢類食物傷脾胃,寒氣凝滯就會導致惡露不下,導致產後腹痛、周身骨痛等。另外,產後因失血傷津,要少食葱、薑、蒜、辣椒🌶,否則易有便秘同痔瘡。

6種坐月有益食物
1. 黑芝麻:促進乳汁分泌
生產過後多耗傷精血,會導致頭暈眼花、乳汁不足、健忘、脫髮、便秘,而黑芝麻能養血、滋補肝腎,促進乳汁分泌,好啱坐月媽媽食用。

食用方法 : 可購買市面磨好嘅黑芝麻粉,加熱水服用。

2. 桑寄生:治關節麻木痠痛
產婦坐月時,因氣血虛弱易出現手腳或關節痠痛,而桑寄生可祛風濕、益肝腎、強筋骨。
食用方法 : 做桑寄生茶,將桑寄生50克、紅棗、蓮子各10粒、雞蛋2個及適量冰糖放入煲煮便成。

3. 南棗:改善自汗及盜汗
南棗比紅棗更補血及補而不燥,滋補之餘仲可以改善因身體虛弱而出現嘅自汗同盜汗。
食用方法 : 用南棗焗水或煲湯飲用

桑寄生茶 ( 圖片來源 : sweetheartkitchen.com )

4. 茯苓:改善代謝失常水腫
茯苓有淡滲利水、健脾胃、寧心安神作用,可改善水腫,不過要留意腎虛多尿及口乾者不宜服用。

5. 淮山:促進傷口愈合
產婦生產後,出現氣陰兩虛,食慾不振,淮山除咗促進傷口癒合,亦能補脾肺腎、益氣養陰同幫助消化。
食用方法 : 用山藥嚟煮粥、煲湯

6. 海參:改善小便頻數
產婦生產後腎精虧虛、小便頻數、腰痠乏力、陰血虧虛、大便秘結,所以坐月期間飲食都以清淡為主,而海參膽固醇低又高蛋白,多食都唔會致肥,有補腎益精、養血潤燥功效。

資料來源

中醫坐月子調養兩階段,把握產後復原關鍵期!  廖芳儀中醫師

坐月8大謬誤,你有冇中伏?  黃志東中醫師                                        

坐月餐單10個不能錯過的益物   許素芳中醫師