玫瑰痤瘡、暗瘡分唔清 ? 🧐

戴口罩戴咗超過一年😷,唔少人面上都試過有皮膚問題,如皮膚敏感、生暗瘡、面油增多等,但如果面頰皮膚持續灼熱紅腫同出現丘疹,就要特別留意,有機會係患上玫瑰痤瘡 。

玫瑰痤瘡4類型
 
麥皚淇醫生提出,20-40歲嘅女性患上玫瑰痤瘡機會會較大,可分為4種類型 :
 
1. 泛紅血管型
臉頰有灼熱感覺同泛紅。
 
2. 丘疹痤瘡型
臉部出現紅點(丘疹)同痤瘡。
 
3. 酒渣鼻
鼻上毛孔粗大,亦因經常充血變得又紅又大。
 
4. 眼睛泛紅👁

 

玫瑰痤瘡成因及預防
 
成因有好多,如遺傳基因、毛囊內有蠕型蟎蟲🐛、血管神經病變、紫外線、戴口罩、炎熱天氣、飲酒、辛辣食物、情緒壓力等都會導致面部血管擴張,令皮膚發炎、發紅同生痤瘡。
 
麥醫生提醒想預防患上玫瑰痤瘡,需要避免曬太陽、時常保持心平氣和同戴口罩時間唔好太長。
 
玫瑰痤瘡 vs 暗瘡 vs 皮膚敏感
 
痘痘分佈位置
 
玫瑰痤瘡主要出現喺臉部中央,包括額頭、眉心、鼻子、面頰同下巴,痘痘係紅色丘疹而冇膿頭 ; 暗瘡就生喺皮脂腺旺盛地方,如成塊面、胸口同背部,通常都係有膿頭💢 、黑頭及粉刺。
 
痕癢
 
玫瑰痤瘡唔一定痕,但皮膚敏感就經常都會🔱。麥醫生解釋因為8成玫瑰痤瘡患者都係敏感肌,所以病發時更易混淆。

圖片來源 :  康健雜誌

西醫治療3部曲
 
第一 避開病因
如曬太陽、焗桑拿、壓力大
 
第二 用適當護膚品
唔好亂敷面膜同搽好多唔同類型護膚品
 
第三 醫學治療
方法有外塗醫生處方藥物,含有Ivermectin成份嘅藥物能抗蟎蟲,減少佢哋喺皮膚上生長同消炎,另外亦可服用口服藥及做彩光或激光舒緩症狀。

彩光 ( 圖片來源 :  幫趣 )

中醫治療
 
喺中醫角度,譚莉英中醫師提到玫瑰痤瘡有幾種症型:
 
肺胃熱盛
病情初期,遇到寒冷、溫熱、空氣唔流通、或飲熱湯、食熱粥或辛辣刺激性食物、精神興奮時🙌,鼻尖會出現紅斑,不過好快就消退。後期紅斑持續唔退,皮膚毛細血管擴張。
 
熱毒蘊膚
無明顯黑頭同粉刺,喺紅斑上出現丘疹或小膿疱,皮膚顏色因毛細血管明顯擴張而變為紫紅色,病情可以持續幾年,最後發展成酒渣鼻👃
 
氣滯血瘀
鼻尖因結締組織增生同皮脂腺增大而變肥大,形成酒渣鼻,可以見到有唔少結節隆起,令皮膚增厚,凹凸不平。

酒渣鼻 ( 圖片來源 :  TVBS 新聞 )

黃卓雄醫師解釋,治療玫瑰痤瘡,「涼血四物湯🍵」係常用處方,成份有當歸、川芎、赤芍、黃芩、赤茯苓、紅花、陳皮、生甘草,能清熱、涼血、祛瘀。患者亦可用銀花、連翹、黃芩、菊花🌼等煎水服用,不過如果患者出現酒渣鼻病徵,中藥治療就未必有用。黃醫師推介以下2款食療:
 
山楂粥
 
材料:乾山楂 30 克、粳米 60 克
方法:所有材料放入鍋中,加適量清水煮成粥即成
服法:每日1 次,連食3 日
功效:活血化瘀、行氣消滯✔️
禁忌:孕婦、脾胃虛弱、血糖過低、大病或久病後人士避免服用
 
苡仁綠豆海帶湯
 
材料:苡仁 30 克、綠豆 50 克、乾海帶 20 克、豬瘦肉 250 克、鹽適量
方法:所有材料放入鍋中,加適量清水煮滾,再轉用慢火煮 2 小時,加入鹽調味即成
服法:每日 1 次,連食 3 日
功效:清熱解毒、祛濕利水💦
禁忌:體質寒涼、脾胃虛弱者、大病或久病後人士避免服用

山楂粥 ( 圖片來源 :  中文百科知識 )