小兒濕疹大作戰  😎 止痕袪濕要聽專家意見 📢

上一期提到成人濕疹嘅特徵同對治方法，今期會針對嬰兒👶同小兒濕疹，由幾位中醫師同自然療法師分享舒緩秘訣，希望家長們有多啲方法傍身。

BB濕疹個案分享

彭子芯中醫師分享其中一個個案，一位3個月大BB初起感冒🤒，食咗西藥後退燒，但身上反而開始出現紅疹，以面部同小腿為主，十分痕癢，BB忍唔住抓令皮膚破損流血，脾氣亦因瞓唔好而變差，最後紅疹仲蔓延到全身。
 

彭醫師斷證時判斷為「風濕熱毒」而形成濕疹，同時因為BB媽媽同家姐都有患過濕疹，反映家族有濕疹遺傳傾向，加上感冒時受咗風濕熱邪🔥，天氣濕熱，內外因素夾擊下引發濕疹。
 

最後，BB經過兩個月中藥治療，全身濕疹皮膚好番晒，連帶呼吸道、腸胃、睡眠等問題都有好轉。

嬰兒治療濕疹方法大不同

服用中藥 ☘️

BB嘅中藥處方同成人會有唔同，彭醫師解釋根據年齡比例，用量會減少，好似以上個案，3個月大BB，中藥用量只會係成人嘅1/3，亦會比較揀容易入口嘅中藥，用一小杯水沖開就足夠，想更方便，可用小針筒唧藥餵食。

止痕

通常會用冷敷為患處降溫，能暫時止痕，再搽中藥止痕藥膏。如果濕疹皮膚偏乾，喺搽咗藥膏後再薄薄搽上一層保濕霜以作滋潤💦。

媽媽飲食上配合

1. 餵人奶嘅媽媽 🍼

母親要盡量少吃辛辣、煎炸、濃味、海鮮、鵝鴨等燥熱或濕熱食物，避免由母乳被BB吸收。另外，許懿清中醫師提出，有研究顯示，如母親以全母乳餵哺BB 4個月，能增強BB抵抗力💪，有助減低2歲以下兒童患有濕疹機會。

2. 有濕疹病史嘅家長

如果自己同老公都曾患過濕疹，孕婦喺懷孕6至7個月起就要注意「清胎毒」，調整偏熱體質🙌 ，坐月時唔好進補得太燥熱，以免餵人奶時將熱傳俾仔女。
 

3. 體質偏熱媽媽

可不時食用清熱食品或中藥，例如綠豆、雪梨、西瓜🍉、苦瓜、椰子、白蓮鬚等。
 

4. 患有濕疹嘅懷孕婦女

許醫師指出懷孕期間荷爾蒙轉變同精神壓力，都可能令濕疹發作。如媽媽體質寒涼但胎熱，中醫都會多用外用藥同針灸做治療，避免❌影響胎兒。

而愈接近分娩，孕婦體質會愈熱，更要避免食煎炸油膩食物🍟🍤，飲食應以清熱、涼血同去胎毒為主，減低濕疹復發機會。

治療以化濕為主

除咗止痕，想治標又治本，需要通過平衡陰陽、調理五臟祛病除疹。治療通常會集中涼血滋陰、解毒祛風、清熱化濕、健脾益氣👍、調和氣血。

許醫師提醒，化濕係一個醫濕疹嘅重要關鍵，詳情可參考上一期嘅 < 根治濕疹唔靠搽藥膏 ? >

嬰幼兒濕疹常見問題
 

李廣冀中醫師行醫期間，經常遇到以下濕疹問題，希望同各家長分享 :

1. 餵人奶係咪比餵奶粉更好？

答：餵人奶係可以增強BB抵抗力，從而⬇️減低小朋友患上濕疹機會，不過同時都要留意母親體質同飲食習慣，都會影響人奶質素。

2. 除咗搽藥膏同服中藥，如果想止痕仲有咩可以舒緩痕癢 ?

答：可用拍打方式代替抓皮膚，亦要幫小朋友剪指甲或者戴透氣手套，避免越抓皮膚越傷💢。

3. 濕疹BB應唔應該日日沖涼？

答：李醫師解釋係可以日日沖涼，能減少表皮致敏原，但唔好過度清潔或沖涼時間太長太多次數，因為會減少皮膚脂膜，影響皮膚抵抗力，沖涼應沖少過10分鐘⚠️，水亦唔好用太熱，可減低刺激。

4. 濕疹小孩可唔可以游水？

答：泳池有氯氣，會加重濕疹，游海水會較好，海水有抑菌作用，不過要避免皮膚長時間暴曬。
 

5. 有冇需要做敏感原測試？

答：中醫治療唔駛知道敏感原先去治療，只要矯正體內陰陽氣血平衡，讓正氣存內☀️，敏感原或其他不利因素就唔可以令身體致病。

DIY天然濕疹膏 🌟

傳統西醫濕疹藥膏含有類固醇，皮膚易越搽越薄，一停用又容易翻發，天然治療師嚴浩分享濕疹DIY潤膚膏配方，以下配方僅作參考。

方法是以椰子油為基礎，再加入3種滋潤材料，如蜂蠟、甜杏仁油、大麻籽油 :
 

1. 椰子油 🥥

係天然保濕劑，有效緩解牛皮、癬皮炎、濕疹等皮膚問題，但唔可以單獨使用過量，如果唔係反而令皮膚紅腫。

2. 甜杏仁油

對消除紅腫乾燥同發炎皮膚特別有效，豐富維他命可抗敏並同時促進細胞生長✔️。

3. 大麻籽油

豐富脂肪酸、維他命及礦物質能保濕同鎮靜肌膚，紓緩濕疹。
 

4. 蜂蠟 🍯

可減少水分流失，剌激性亦好低，不會引起過敏，係用嚟做抗敏感潤膚膏嘅好選擇。
 

DIY 濕疹膏配方

材料 : 椰子油 15毫升、甜杏仁油 15毫升、大麻籽油 15毫升、蜂蠟 12克

做法：
將椰子油、甜杏仁油同蜂蠟放入玻璃容器內隔水加熱，之後取出加入大麻籽油撹勻，再倒入可其他容器中等待凝固即成。

資料來源