用甜睡法寶 綿羊都唔駛數 🐑

疫情持續加上生活壓力，想瞓一覺好都唔係咁容易，先從中西醫角度了解自己有冇失眠同所屬相對證型，再配合醫生建議、按穴位同食療方法，想一覺瞓到天光就唔難啦～🥳

中文大學2020年一項研究顯示，7成受訪者喺過去半年有失眠問題🥺，當中25%認為失眠影響日常生活，值得留意嘅係，報告指出，4成人失眠時會咩都唔做繼續瞓喺床上，2成人會玩手機或電腦，可見唔少人對舒緩失眠都未有用太多方法。

點為之失眠?

世界衞生組織對失眠嘅診斷標準包括：

• 難入睡、難以維持睡眠狀態或睡眠質素唔好
• 每星期至少出現3次睡眠問題，最少持續1個月
• 思考🧠太多睡眠問題所帶來嘅影響
• 睡眠問題令患者有明顯困擾或影響日常生活

雷永昌醫生提出，長期失眠會導致抵抗力下降，⬆️增加患上心血管疾病、情緒病等風險，建議大家可平衡工作與生活時間，保持心境開朗。

 邊類人較易失眠? 

根據2017年台灣睡眠醫學會指出，喺醫學臨床上發現，以下5種個性🚻嘅人容易會出現睡眠困擾：

1. 想法悲觀

2. 易緊張😨

3. 完美主義者

4. 高控制慾嘅人

5. 習慣將情緒內化，即係會將唔開心嘅事或煩惱收喺內心深處嘅人

改善睡眠三個法寶✔️

如果你有以上特質，可參考精神科醫生李誠醫生意見，李醫生曾經有長達10年時間失眠，之後用咗以下幾招去瞓得好啲👍 :

1. 早睡早起

李醫生建議最好將生理時鐘交番俾自然光線管理，早起早睡，早起夜晚自然容易感到眼瞓。另外，最好清晨或下晝散步40分鐘，等身體吸收自然光線☀️，抗衡室內人造光線如電腦及手機嘅藍光，夜晚自然更容易入睡。

2. Digital Detox

睡前兩個鐘唔用電子產品睇任何資訊，做腦袋排毒，如果臨瞓仲睇新聞，腦袋會以為你喺事件現場，激發本能反應作戰或逃走🏃，身心難以放鬆入眠。

3. 培養益生菌

腸道係人類第2個大腦，寄生咗10萬億細菌，重量達1.5公斤，腸道無時無刻同大腦溝通。李醫生解釋，如果照顧腸道照顧得好，能減少大腦對壓力過度敏感，失眠都會少啲。

想增加多啲唔同種類嘅益生菌👾，每餐著重食多啲蔬果，同盡量食多啲唔同顏色嘅食物。

失眠五大證型

中醫認為失眠係由於情志、飲食、年齡漸增等因素引起，令心神失養或不安，導致唔能夠有正常睡眠🥱。朱穎詩醫師指出，中醫失眠有五大證型 :

1. 肝鬱化火

原因 : 生氣、太攰或緊張之後上火🔥，肝火過盛，擾亂心神

特徵 : 雙眼出現紅筋、口乾口苦、頭暈頭脹、雙眼有紅筋、小便黃、大便乾

治療方法 : 瀉肝膽實火，清下焦濕熱。

2. 痰熱內擾

原因 : 經常大魚大肉🍖🍱，煙酒不斷，太攰或緊張，痰熱內蘊，擾亂心神

特徵 : 胸悶心煩、頭重、口苦、便秘

治療方法 : 清心降火，化痰安中。

3. 心脾兩虛

原因 : 久病或身體虛弱，導致心脾兩虛💨，心神失養。

特徵 : 頭暈、心慌、冇胃口、肚脹

治療方法 : 益氣補血，健脾養心

4. 陰虛火旺

原因 : 腎水不足💦，不能上奉於心

特徵 : 腰酸腿軟、心煩心慌、晚上出汗多、夜間煩熱、頭暈耳鳴

治療方法 : 補益肝腎

5. 心膽氣虛

原因 : 心膽氣虛，痰濁內擾，導致心神不安😅

特徵 : 容易受驚嚇、心慌氣短、易攰、經常出汗

治療方法 : 益氣鎮驚，安神定志

朱醫師建議，情緒對睡眠有好大影響，日常可積極調整自己心態，順其自然咁對待睡眠😘。另外，中醫認為「胃不和則臥不安」，飲食不節會出現胃氣不和，脾胃就唔可以正常消化食物，影響睡眠。

晚飯適宜食一啲清淡易消化食物，但都唔好食太少，以免夜晚餓醒。

如果夜晚失眠，朱醫師推薦以下兩個穴位做穴位按摩👉，能幫助入睡 :

<百會穴>

位置：喺頭頂正中央，頭頂正中線與兩耳尖連線嘅交叉處

功效：化解疲勞🤩，預防頭暈頭痛。

<神門穴>

位置：喺手腕內側，小指向下延伸至手腕關節嘅橫紋處

功效：有鎮靜、安定心神功效，緩解心神不寧以及改善多夢。

花茶改善失眠 ❤️

日常如想由飲食著手，可以試下由以下材料配製嘅花茶:

薰衣草

味辛，性涼。自古被稱為『百草之王🌟』，具有鎮靜神經、舒緩情緒，催眠作用。除咗飲用外，最常採用就係薰衣草精油，同樣有助改善睡眠質素作用。

洋甘菊🌼

味甘、性微涼。有寧神安眠，舒緩緊張情緒功效。歐洲人自古以來但凡有感冒、發燒症狀，便會飲用洋甘菊，再加一點鮮蜂蜜來舒緩。

茉莉花

味甘，性溫。有疏肝理氣，舒解鬱結作用。茉莉花味道芳香，價錢亦相宜。多飲茉莉花茶🌷唔單止令人放鬆情緒，對女士嚟講更係好好嘅養宮食材。

炒酸棗仁

《本草綱目》記載︰「棗仁，熟用，療膽虛不得眠，煩渴虛汗之症；生用，療膽熱好眠。」，說明酸棗仁可養心安神，特別適合因為虛煩而引起嘅失眠💯，易醒或多夢人士可服用。

鐵皮石斛花

含有豐富石斛多醣、多種生物鹼、氨基酸、微量元素同膠原蛋白，有重生、改善睡眠、舒緩緊張等功效。

資料來源

睡眠系列 精神科名醫李誠3招擺脫10年失眠之苦 早睡早起原來係錯嘅  李誠精神科醫生
 

有錢難買天明覺 中醫拆解失眠5大證型  朱穎詩中醫師
 

中大研究指近7成港人失眠　精神科醫生教一分鐘自測是否有失眠   雷永昌精神科醫生
 

如何能夠極速入睡！良茶坊養生花茶