日月魚，原來唔係魚？ 有咩功效？ 點分真假？

日月魚呢個名字聽落好似好神秘，唔通同武俠小說入面嘅日月神教有關？非也！日月魚，其實唔係魚，而係一種珍貴嘅貝殼類海鮮，主要分佈喺東南亞嘅海域，係香港人好熟悉嘅食材。日月魚擁有豐富嘅營養價值，同時有多種健康功效，特別適合用嚟煲湯。

根據江湖上 (網上) 嘅傳說，日月魚呢個名嘅由來，係因為佢嘅形狀同埋顏色。日月魚嘅乾品呈圓形，好似滿月咁圓，而且佢嘅顏色金黃光亮，令人聯想到太陽同月亮嘅光芒；另一種講法係，日月魚外殼呈圓形，一面紅色似太陽，另一面潔白似月亮；加上有條「尾」，因此，呢種海鮮就被香港漁民稱為「日月魚」。

日月魚主要分佈喺日本、南韓、台灣、南海、菲律賓、東南亞、澳洲等水域，生活喺離岸到水深10－100米嘅沙質海底。台灣人會叫做日月蛤、日月蟶、日月貝、海扇蛤。漁民捕捉到呢種貝類後，會將佢嘅肉連同腸臟一齊抽出，切去黑色內臟，然後曬乾，就成為咗可以用來食用嘅海味乾貨。

日月魚食療功效

講起日月魚嘅療效，大家好容易從佢個名已經估到：日月為明， 最直接諗到嘅就係「明目」，因此有人又會叫日月魚做明目魚。另外，日月魚吸收咗日月精華 (笑)，好適合日夜操勞嘅人！事實上，日月魚含有豐富嘅蛋白質、維他命A同埋磷、鐵、碘及鈣質，係身體健康必需嘅營養素，可促進細胞生長，幫助新陳代謝，對小朋友智力成長、身體發育特別有益。日月魚對眼睛健康好有幫助，特別適合長時間用眼 (對住個 Mon) 嘅人群。此外，據中醫所講，日月魚仲有滋陰、補肝、益腎、養顏、美髮、清熱、利濕、活血、健脾、益氣、醒腦及強健筋骨嘅功效，對改善陰虛體質有一定嘅幫助。

日月魚點食法？

新鮮嘅日月魚，梗係蒜蓉粉絲蒸啦！可惜，新鮮嘅日月魚喺香港市面唔常見。至於海味乾貨日月魚，用嚟煲湯係最常見嘅做法，可以配合唔同嘅藥材同食材，例如淮山、合桃、紅棗同埋杞子等；配肉類煲湯，鮮甜美味，而且煲出來嘅湯會有雞湯嘅香味。買日月魚返屋企煲湯，處理方法非常簡單，只要將佢洗乾淨，再用暖水浸半小時，配埋其他材料一齊煲湯就得。由於日月魚呢種海味藥性溫和，補而不燥，適合一家大細飲用，而且可以配合多種不同的食材，大家不妨試試。

【芳姐推介】合掌瓜日月魚蔬果湯

今日我哋會介紹一款【合掌瓜日月魚蔬果湯】- 鮮味得嚟又清清哋，簡單易做，係清心火、滋陰養顏 Keep fit 之選！

材料：🐚 日月魚4粒 + 🥒合掌瓜兩個 + 🌽 粟米一條 + 🥕紅蘿蔔一條 + 🥜 腰果20粒 + 🍈 羅漢甘果1/3 個

做法：日月魚先用水浸1-2小時；所有材料洗淨切件，加入2.5升水；大火滾15分鐘，再轉中火煲30分鐘；最後15分鐘加入羅漢甘果。

呢個湯主要係蔬果，加4粒日月魚係精髓，成啖湯帶有海產嘅鮮甜🤭 我連鹽都冇落，因為本身日月魚已經有陣鹹香😉 食得肉多，或者胃口唔好，要食多啲🥒🥦🫛平衡下！食曬啲料已經好飽肚，連飯都唔使煲🤹‍♀️

☘️ 小貼士：素食者可用合桃及栗子代替日月魚，製作全素版本，補腦、益腎、醒神又好飲！

日月魚點樣分真假？

由於近年來海洋受到污染，令到日月魚嘅產量漸少，價錢亦不斷上升；有不法商人就利用墨魚、魷魚等加工，做出假嘅日月魚來欺騙客人。市場上假冒嘅日月魚越來越多，消費者喺選購時要特別小心。以下係幾個辨別真假日月魚嘅方法，幫你揀到真品。

1. 觀察外形：真嘅日月魚乾品呈圓形，形狀自然，乾身而且厚薄均勻。假嘅日月魚通常形狀唔規則，可能會有拼接嘅痕跡，厚薄唔均。

2. 檢查色澤：真日月魚嘅顏色光亮，乾品色澤自然，有金黃光亮感。假日月魚嘅色澤多數比較暗啞，可能帶有異樣嘅顏色。

3. 聞氣味：真嘅日月魚有淡淡嘅海鮮香氣，氣味清香自然。假嘅日月魚可能有異味，或者無乜香味。

4. 試手感：真日月魚乾身，摸落去有一定嘅硬度，但唔會太脆。假日月魚通常比較脆弱，容易斷裂。

5. 選購渠道：選擇信譽良好嘅商家或者品牌，可以減少買到假貨嘅風險。網絡購物時要睇清楚商家嘅評價同埋產品描述。

👉 伸延閱讀：健脾去濕食物 祛濕湯水食譜 簡單易做 一文睇晒  ⚠️